كمشِة شِعر
اخبار مباشرة
مارون ضاهر
Saturday, 09-Nov-2019 06:29

عيونِك الثورة.. وفَجِرها شمعة
وشِلح الأرز عا زنودنا عِتبان
وكِلما على جفونِك شرَق دمعة
بيِشرُق فَجِر تاني بسَما لبنان

• • •
غمَرتي العَلَم رَفرَف .. ضِحِك وِجّو
والدمّ عا طرافو خَجَل دافِق
انتَفضِت الأرزِة .. شلوحها احتَجُّو
مِش عارفي بصِدرِك وَطَن خافِق

• • •
عا جبينِك الثورة..وعِينيكي سهام
ولو كل ّ ساحة عَم تشوفِك سوسنِة
خَلِّي جَدادِيلِك حَبِل إعدام
ولا تطَلّعي للخلف يا إم الدني

• • •
لو كِلّنا بلِبنان كِنّا خُوت
بيِحلَى العَيش .. وتُقبُر الهُجرَة
ولَو لعِبنا بَس بَيت بيوت
منِربَح بَراءة وحُبّ مِش تَجرَة
كوَام السعادِة مِش غِنى وياقوت
خِبزِة وزَيتونِة .. وبِنِت عَجرَة
ونَسمة بتِهمُس عَالَسكِت وِتفوت
والشمِس بِعيونِك شَرَق فَجرَا
وقَمطَة وصَبِيِّة عَم تحَوِّش توت
تجَلغِم صَبيعا بحُمرِة الشجرة