وَصِّي عَ كاس نبيد
اخبار مباشرة
مارون ضاهر
Friday, 31-Jan-2014 00:08
لا تِستِحي... ضَلّي
وخَلّي الزمان يكَسِّر عتابو
وقلب الحبيب الـ دَشّر صحابو
بي فَرشتو غِلّي

لا تِستِحي... خَلِّي الزمان يدور
ويرَجِّع اللي غاب
اشتقنا لَـ هاك الباب
لمّا انطبَش مَرقِتْ اللحظة دهور
عليّي ... وعَ الغِيّاب
بقِيتْ العُمُر مَقهور

وِن كان بدّو الحبّ يِجمَعنا
عالموقَدِي مْنِ جديد
وَصِّي عَ كاس نبيد
وعَشِعْشِي بـ قلبي وعَلى القرميد
وما تْخلِّي الشَوق يِلدَعنا

هالعمر نَسمِه مارقَه عالتَلّ
لَحظات ... وبْتِقْفِي
وِنْ كان بَدِّك نِرحَل وما نضَلّ
لا بَقا تِغفِي
بَلكِي سَرَقْنا النوم بالمِخْفِي
عَن عيون الكِلّ...