الإسم
البريد الإلكتروني
١ - إسم صديقك
١ - البريد الالكتروني لصديقك
٢ - إسم صديقك
٢ - البريد الالكتروني لصديقك

على مدار الساعة

مارون ضاهر
-
جريدة الجمهورية
شيمان... طلّي شي مرّة
print
favorite
هذه القصيدة التي ألقيتها ليلة زفاف إبنتي شيمان، هي مزيج من نبضات، وخليط من مشاعر، خرجت من خفقان قلبي لأعلن فيها، وجعي وفرحي في آن. هكذا هي الدنيا، كالورود، عبيرها يُنعش الروح، أما أشواكها فتُدمي.
سبحان الله لخالقك متل القمر
كشّح الغيم وقال ناوي عالسفر
ومش هامّو من هالدني إلّا دني
يكون فيها الياس بس من البشر

قال ناوي يسافر ويرسم مدى
لسنين جايي وحب ما بيشبه حدا
بين السما والأرض عا موج البحور
وعا حروف مكتوبة بلا صوت وصدى
يخلق مروج مكوّني قبل الدهور
حتى النحل بعدو عليها ما اهتدى
ويبعت خيوط الفجر شلالات نور
تلوّن خدود الورد وحبوب الندى

قال ناوي يفلّ عا مطرح حلو
نقطة على السطر وخلص لا تسألوا
وحمّل خوابي معتّقة حب وشقا
وسنين شقّعتا إلو وهيّي إلو
ودار ضهرو وقال ما فيّي بقى
منّي يا أهلي دخلكن لا تزعلو
قلبي سبقني وراح عا موعد لقا
ولو تركتو بكون بدّي إقتلو
شو هالدني لفِيها البُعد والملتقى
شوفو يا ناس فصولها وتأمّلو
وبس قولو كيف بدّي إعتقا
وكيف بقدر هالفراق إتحمّلو

شيمان كلما بفتكر يوم الفراق
بينشق صدري شقفتين بموضعو
شقفه بتصرخ للوجع شدّ الخناق
وشقفه بتندَه ليش ما بترجّعو
هيدا حبيب القلب لما القلب فاق
عا بِنِت سقيت وردها من مدمعو
تا فتّح وعلّى وطعم العطر داق
وصار الصبح مشتاق حتى يدلّعو
وكلما انسكب نقطة ونقطة عالوراق
ما بتنطفي الأشواق عمبتولّعو

بنتي تركتي من الحنين جرار
مكسّرة عا باب هاك الدار
شو بعوزها ما هالحنين لفلّ
منّو بحاجة لحبس من فخار
لِحقِك على كروم الورد والفل
تيضلّ حدّك يا قمر نوار
وتيضلّ عايش جنب منّك ضلّ
ولو راح جسمو تارك بهالروح
نهدات ما بتتعب من المشوار

هالقدّ عندي شوق للأحباب
وعمفرفطو كلما اشتقت ليكي
وبتخايلك عمتوقفي عالباب
وعمتضحكي بغمزات عينيكي
وعمتندهيلي من طرف الهداب
وعمتحضنيني بين إيديكي
ولو ما يفيّق سكرتي السرساب
ويمسح دموع لذرفت عليكي
كنت واقف بعدني عالباب
وروحي عمبترقص حواليكي
ويا كرم الحب صبّ نبيد صافي
وطفّي بيعناقيدك شفافي
عقلي تشوّش وشو صرت حابب
إبقى بين واعي وبين غافي
وقلبي طقّ عا بعد الحبايب
وما عمترويه أبيات وقوافي
شقّي عليه يا بنتي الغايب
إذا عذرو معو وبيكون شافي
كتير منيح لكن قلب دايب
عليكي بالشهر لنّو شي مرّة
طلّي ورجّعي ليه العوافي
إذا بدّك ما صار العمر قافي

ويا الياس الفرح رّيش جناحو
وعلى إيديك نهداتو ارتاحو
عبّي بيتك منِ الإبتسامة
بيعمر فيك وبتكتر فراحو
ربيت على الإبا والإستقامة
وأهلك عنهن ولا يوم زاحو
كبِرت فيهن على روح الشهامة
وبِملقى عطرهُن عالناس فاحو
وإذا قدران مع هيدي الوسامة
تاخد عالوفا أعلى علامة
علامة فارقة بتصير عنّا
وعلى خدّا لستّ الحسن شامة
ساعتها طلوب روحي بستمنّى
روحي بقدّما إلكن هديّي
وبمحي كل إيام اللي راحو

ويا إبني بعمرك لجايي تهنّى
وما تخلّي عليك ولا ملامة
وإذا مرّة الزمن جار وتجنّى
وبدّو يحيد عن درب السلامة
ضرُبو بسيف المجد ما المجد غنّى
لوِقِف متلك على عرش الكرامة
وقفة عز عا روس الأسنّة
وندر حالو لحتى يكون راية
بعمرا ما حنِت للظلم هامة

لكن مع شيمان اعتبر إنّو
طلوع الفجر وجّا اعتاز منّو
ولحتى يِشرُق بشمسو استحلى
يِسرق من جبينا الصبح عنّو
عمِلها دالية ترِكها تتِحلى
قطِفها وشوف ديّاتك شو جنّو
عمِلها جنينتك ما العطر أحلى
إذا عطورا على إيديك حنّو
عمِلها طيور وغصونك شلحلا
تروك طيورها عليهن يغنّو
حمِلها بقلبك وقلبك فتحلا
وخلّي الحب وقفاصو يجنّو
جرحلا آه ناياتك جرحلا
ما صوت الآه من قلبك كأنو
مساحة حدودها الكون ويا محلى
الكون اللي كتب إسمك لأنو
بيعرف شو عطاك وقال أهلا
بإلياس وشيمان الحب شِفنا
تهنّوا فيه يا ولادي تهنّوا
DOWNLOAD OUR MOBILE APP
X
Sign Up for our free daily newsletter
© 2018 Al Joumhouria, All Rights Reserved.