الإسم
البريد الإلكتروني
١ - إسم صديقك
١ - البريد الالكتروني لصديقك
٢ - إسم صديقك
٢ - البريد الالكتروني لصديقك

على مدار الساعة

مارون ضاهر
-
جريدة الجمهورية
بخاطرِك... قلبي معِك
print
favorite
دقّت عا خطّي وما كنت بالبيت
وتركِت رساله بصَوتها الدبلان
قالت: حبيبي بخاطرك... يا ريت
بقدر انا كفّي معك
كل العمر كل الدهر
قبلان مش قبلان
تقلّي قصيده واسمَعك
أقعد بحضنك... إقشعك
ولولا برضايي ما كِنت فلّيت...

يا ريت بقدر فرّغ دموعي
واشهق على كتافك الـ حملوني
وشِدّ عاكفوفك الـ سقيوني
ورِويو عطش قلبي وما تركوني
وشفاف ياما عيّطو بإسمي
ومن طيبتن قديش طعموني
ويا ريت فيّي شبّعو لجوعي
لعينين بين ايديك رميوني
ويا ريت كنت وعيت عا ولوعي
من قبل ما خبّيك بضلوعي
ودقات قلبي يتكتكو ويتلبّكو
وما يشتكو
ويغرّبو عيوني...

لا تفكّر رايحه وقلبي معي
قلبي معك عم يسمعك
بتقول ليش ما بترجعي
دخلك تعي
والله العظيم إنو أنا
نسيتو معك
عن قصد وترَكتو لحسّي يسمعك
دقّات كانت من الحب تولّعَك
تركتك لإنو ما بقالي ودّعَك
ووجّي الحلو اللي كان خدو يدلّعَك
داب من كتر المرض
وبطّل حلو يركض إلك
يستقبلك...

ومش رايده شَوّه جمال بيعبدك
بعيون حلوي بُبْهُن قلبي امتلك
قلت بدي فِلّ بالوج الحلو
وحبّي يضلّ بأوّلو
وقلبي اللي ودّيتو معك
يبقى معك عايش ملك...

وهجّيت من بيتي بِحالِه من الجنون
وما عرفت وين بروح
وصفّيت من دون روح
وكيف بدّي احجب دموع العيون
والحبيبه الـ كِنت حبّا واعشقا
من عمرها ما في بقى
ايام يمّا شهور
ومن بعدها ما منلتقى
مع بعضنا
ولا يعود فينا نكمِّش فراشات
فوق التلال حدّ النهر
ولا نختفي خلف الكروم
نألِّف حكايات
ومن بعد ما نفَتِّق كمام الزهر
نكتب فرضنا
نسرّب قبل النجوم
والهَم هاشِل ما نشوفو بدربنا...

وركضِت صوب البحر مطرح ما الشراع
حمّل حبيبي وضاع
وصرت لوم البحر شو بيساع
وليش تا ياخُد معو القلوب
وقلوب يتركها عا شَطّو مكسّره
وعالهجر ياما محَسّره
وعالحب ما بتتوب...

ولمَحت ايد بتلوِّح من بعيد
ومتل الـ كإنا مكبّشه بالشط
وسمعت صوت بيشبه التنهيد
وحسّيت قلبي نط
وناقصو جوانح لحتى يطير
يسابق الريح الـ صَوب مركبها
وفوق صدرا يحط...

وبقيت واقف لوّح بديّي
تا تقطّعو
تا تخلّعو
وما عدت قادر ما بقى فيي
اوقف عا إجريي
ودقات قلبي تسارعو
وصرت بين الرمل والميّي
انسان من دون قلب
تايه بنص الدرب
ومش عارف يكفّي حياتو الباقيه
من دون أمل
ما بتِنحَمل
ولا عارف انكنو حبيبو الغاب
بيبعت رساله تانيه عند الغياب
يقلّو تعا شو باك
لولاك لا مَوت وحَيا لولاك
قوم هلّق ناطرِتَّك تا تجي
تروك الدني
ولا تعود تتطلّع وراك...
DOWNLOAD OUR MOBILE APP
X
Sign Up for our free daily newsletter
© 2018 Al Joumhouria, All Rights Reserved.